Ճանապարհներ կառուցելը կենսական անհրաժեշտություն է, բայց․․․
Անորակ ճանապարհաշինություն
Հայ-թուրքական սահմանի բացման համատեքստում որոշվեց հիմնանորոգել Թուրքիայի սահման-Մարգարա-Վանաձոր-Տաշիր-Վրաստանի սահման 183,7 կմ երկարությամբ Մ-3 ավտոճանապարհը, որը լայն հնարավորություն կբացեր հարևան երկրների հետ ավտոմոբիլային տրանսպորտով բեռնափոխադրումներ կազմակերպելու համար, միևնույն ժամանակ կապահովեր տարանցիկ կապը Թուրքիայի և Վրաստանի միջև։
2013 թվականին ՀՀ պետական բյուջեի միջոցներով մեկնարկեց Թուրքիայի սահման-Մարգարա-Վարդանաշեն-Երասխահուն ավտոճանապարհի սկզբնամասի վերանորոգման աշխատանքները։
Վերանորոգման ավարտից 3-4 տարի անց սկսվեց Մ-3 միջպետական ճանապարհի սկզբնամասի քայքայման գործընթացը։ Սկզբում կարկատաններով փորձեր կատարվեցին վերականգնել ճանապարհի ծածկույթը, սակայն այսօր անզեն աչքով էլ տեսանելի է, որ ճանապարհի սկզբնամասը կրկին հիմնանորոգման կարիք ունի։
Տարածքային կառավարման և ենթակառուցվածքների նախարարության կայքից տեղեկանում ենք, որ ճանապարհի այս հատվածի, այսինքն 0-ից-6,0 կմ-ի համար պետական բյուջեից ծախսվել է 485,6 մլն դրամ, որը 2013 թվականի հաշվարկով կազմում է 1,2 մլն դոլար։ Հիմնանորոգման աշխատանքներն իրականացվել է «Ճանշինվարպետ» ՓԲ և «Տեր-Հայրապետյան շին» ՍՊ ընկերությունների կողմից, աշխատանքների հսկողությունը սահմանել է «Ճանապարհաշինության ԾԻԳ» պետական հիմնարկը։ Ստացվում է, որ Մ-3 միջպետական ճանապարհի 183,7 կմ-ը դեռ ամբողջովին չավարտած, պետք է սկսել նոր հիմնանորոգում։

Արմավիր-Արգավանդ-Մարգարա Մ-5 միջպետական ճանապարհի Արազափի հատվածը նույնպես վերանորոգման կարիք ունի։ Ճանապարհը 2013 թվականին հիմնանորոգել է «Ճանշինվարպետ» ՓԲ ընկերությունը։
Հիմնանորոգումից 3-4 տարի անց ճանապարհը սկսեց քայքայվել։ Յուրաքանչյուրիս մոտ տրամաբանական հարցեր են առաջանում, նախ՝ հիմնանորոգումից հետո քանի՞ տարի պետք է ճանապարհը ծառայի իր կոչմանը, և երկրորդ՝ ինչու՞ պատշաճ հսկողություն չի իրականացվել վերանորոգման աշխատանքների կատարման ընթացքի ժամանակ։
«Թմբախեղդ» ճանապարհաշինություն
Արմավիր-Նորապատ-Մրգաշատ-Արևիկ-Եղեգնուտ–Երասխահուն ավտոճանապարհի վերանորոգման աշխատանքների մեկնարկը տրվել է 2015 թվականին։ Ըստ Տարածքային կառավարման և ենթակառուցվածքների նախարարության կայքի տվյալների, վերանորոգման աշխատանքներն իրականացրել են «Կուարլինի» ՍՊ, «Սիսիանի ԲՈՒԱՏ» ՍՊ և «Ավտոճանապարհային մեքենաներ» ՓԲ ընկերությունները։ Վերանորոգման աշխատանքների կատարման համար Համաշխարհային բանկի և պետական բյուջեի միջոցներից ծախսվել է 1 մլրդ 80 մլն դրամ։
Ճանապարհի սկզբնամասում, Նորապատ համայնքի տարածքում ճանապարհային թմբերի առատությունը ստիպում է վարորդներին շրջանցել ճանապարհի այդ հատվածը։ Վարորդների խոսքով, նախկինում եթե հնարավոր էր փոսերը մի կերպ շրջանցել, հիմա թմբերը ստիպում են շրջանցել ճանապարհի այս հատվածը, 100 մետրի վրա 8 թումբ պետք է անցնել։ Նույն իրավիճակն է ճանապարհի Մրգաշատ համայնքի տարածքում։ Խաչմերուկներին կից թմբերը ոչ մի կերպ չեն արդարացվում։
Այս ճանապարհներից խուսափում են վարորդները, սակայն շատ անվտանգ են արոտավայր գնացող անասունների համար։
Ճանապարհաշինության մեկ այլ խնդիր
2020 թվականին մեկնարկեց Մ-5 Արմավիր-Մ-9 (Արմավիր քաղաքի Երևանյան փողոց) հանրապետական նշանակության ավտոճանապարհի 2.07 կմ հատվածի կապիտալ նորոգման աշխատանքները։ Արմավիր քաղաքի համար կենսական նշանակության ծրագիրն իրականացվում է ՀՀ կառավարության ֆինանսավորմամբ` պատվիրակությամբ Տարածքային կառավարման և ենթակառուցվածքների նախարարության:
Ճանապարհի հիմնանորոգման ընդհանուր բյուջեն կազմում է 983.4 մլն դրամ, աշխատանքներն իրականացրել է "Վահագն և Սամվել" ՍՊ ընկերությունը:
Հիմնանորոգման աշխատանքները մեկնարկեցին հունիս ամսին, միաժամանակ ճանապարհի ամբողջ 2,07 կմ հատվածում։ Հաշվի չառնվեցին մի շարք հանգամանքներ, որոնցից ամենակարևորը տնտեսվարող սուբյեկտներն էին, որոնք գործունեություն էին ծավալում Երևանյան փողոցի վրա։ Տնտեսվարողներից շատերը 6-7 ամիս ստիպված դադարեցրին իրենց գործունեությունը։
Երևանյան փողոցի հիմնանորոգմանը զուգահեռ, սկսվեցին քաղաքի Չարենց և Շահումյան փողոցների հիմնանորոգման աշխատանքները։
Դեկտեմբեր ամսին, երբ ասֆալտապատման աշխատանքներն ավարտվեցին, տեսանելի դարձավ, որ Երևան փողոցի մակարդակը 20-25 սմ ցածր է ստացվել ինչպես իր նախկին մակարդակից, այնպես էլ փողոցը հատող մյուս փողոցների մակարդակից։ Վերանորոգելուց հետո, երթևեկելով Երևանյան փողոցով, ականատեսը լինելով ջրագծերի և կոյուղու դիտահորերի կափարիչների և ասֆալտի ծածկույթի մակարդակների տարբերությանը, հստակ կարելի է արձանագրել, որ վերանորոգումն իրականացնող կազմակերպության աշխատակիցները չեն տիրապետել մակարդակ չափող շինարարական սարքավորումների (նիվիլիր) հետ աշխատելու կարողություններին։
Արդյունքում՝ Երևանյան փողոցին միացող բոլոր փողոցների հետիոտնային անցումները թեք են ստացվել, իսկ թեք հետիոտնային անցումների հետևանքների մասին եզրակացություն կարելի է անել, երբ անցումները պատվեն մերկասառույցով։
Երևանյան փողոցի վերանորոգման աշխատանքների նկատմամբ Արմավիրի քաղաքապետարանն իրավասություն չի ունեցել,- այս մասին հայտնեց փոխքաղաքապետ Վարշամ Սարգսյանը։
This site was made on Tilda — a website builder that helps to create a website without any code
Create a website